މިއީ ޝައިޚް މުޙައްމަދު އައްޞާވީ ކިޔައިދެއްވިއެވެ. މިއީ ޔުނިވަރސިޓީއެއްގައި ކިޔަވަން އުޅުނު ޒުވާން އަންހެން ކުއްޖެއްގެ ޙަޤީޤީ ވާހަކައެކެވެ. އެ ޔުނިވަރސިޓީގައި މާރިއާ ކިޔާ ކުއްޖަކު އުޅުނެވެ. މާރިއާ މުޅި ޔުނިވަރސިޓީގައި މަޝްހޫރުވެފައިވަނީ އޭނާ ކުރާ މައިގަނޑު އެންމެ ކަމަކަށެވެ. އެއީ ދޭތެރެޖެއްސުމެވެ. ދޭތެރެޖެއްސުމުގެ މާނައަކީ އެކަކު އަނެކަކާ މެދު ދައްކާ ނުބައި ވާހަކަތައް ނުވަތަ ދެބައޮޑުވުންތައް، އަނެއް މީހާގެ ގާތަށް ގެންގޮސް، “މިވެނި މީހަކު ކަލެއާ ދިމާލަށް މިވެނި ނުބައި ވާހަކައެއް ދައްކަނިކޮށް ތިމަންނާ އަޑުއެހީމޭ” ބުނުމެވެ. މީސްމީހުންގެ މެދުގައި ބައިބައިވުން އުފެއްދުމަށްޓަކައި މިގޮތަށް ދެބައޮޑުވުމަކީ އިސްލާމްދީނުގައި ބޮޑުވެގެންވާ ފާފައެކެވެ
މާރިއާއަކީ އޭނާގެ ކޯސް ކުދިންނާއި، ދަނާލުގައި އެއްކޮށްއުޅޭ ކުދިންނާއި، އަދި ކްލާސް ކުދިންގެ މެދުގައި މިފަދަ ކަންކަން ކުރުމުގައި ނަން މަޝްހޫރުވެފައިވާ ކުއްޖެކެވެ. އޭނާގެ މި ޢަމަލުތަކުގެ ސަބަބުން ކުދިން އެކަކު އަނެކަކާ ޒުވާބުކޮށް، ގުޅުންތައް ކަނޑަމުންދިޔައެވެ. އޭނާގެ ދެބައޮޑުވުންތައް ގޮސް ހުއްޓުނީ، ޔުނިވަރސިޓީގައި ކިޔަވަން އުޅުނު ކައިވެނިކޮށްގެން އުޅުނު ދެމަފިރިއަކު ވަރިކުރުވުމާ ހަމައަށެވެ
އޭނާ ވަކިން ޚާއްޞަކޮށް އެއް އުޚުތަކަށް އަމާޒުކޮށް ބަދަލުހިފަން އުޅުނެވެ. އެއީ ކުރިން އެ އުޚުތާ މާރިއާއަށް އިޚްލާޞްތެރި ނަޞޭޙަތެއް ދީފައިވާތީއެވެ. އެ އުޚުތާ މާރިއާގެ ގާތުގައި ބުނެފައިވެއެވެ: “މާރިއާ ކީއްވެތަ ޙިޖާބު ނާޅަނީ؟ އެއީ ﷲ ފަރުޟުކުރައްވާފައިވާ ކަމެއް. ކީއްވެތަ އެކަލާނގެ އަމުރުފުޅުތަކަށް ކިޔަމަން ނުވަނީ؟” މި ނަޞޭޙަތް ޤަބޫލުކުރުމުގެ ބަދަލުގައި، މާރިއާ ނިންމީ ބަދަލުހިފައި، އެ އުޚުތާގެ ޢާއިލާ ރޫޅާލައި ދިރިއުޅުން ބަރުބާދުކޮށްލުމަށެވެ. އެ އުޚްތާގެ ފިރިމީހާގެ ހިތުގައި އަނބިމީހާއާ މެދު ނަފުރަތު އުފައްދައި ޝައްކުތައް އިތުރުކޮށް މާރިޔާގެ މި މަޤްޞަދު އޭނާ އެކަން ކާމިޔާބު ކުރިއެވެ
ކަން މިހެން ހިނގާފައިވަނިކޮށް އެއްދުވަހަކު، މާރިއާ މަގުމަތިން ހިނގާފައި ދަނިކޮށް، ކުއްލިއަކަށް ކާރަކުން ޖެހި އެކްސިޑެންޓްވިއެވެ. އޭނާ ވިއްސައިގެން ގޮސް، ބިމަށް ވެއްޓި، އެތައް ފަހަރަކު ފުރޮޅިގެންދިޔައެވެ. ފައިން ފެށިގެން ބޮލާ ހަމައަށް އޭނާގެ ހަށިގަނޑުގެ ކަށިތައް ބިންދައިގެންގޮސް، އައި.ސީ.ޔޫ ގައި އެޑްމިޓްކުރެވުނެވެ. އޭނާގެ އަތުގައި އައި.ޑީ ކާޑެއް ނުވަތަ އޭނާއަކީ ކާކުކަން އެނގޭނެ އެއްޗެއް ނެތުމުގެ ސަބަބުން، އޭނާގެ ޢާއިލާއަށް ހޮސްޕިޓަލުން މިކަން އެންގުނީ ދެދުވަސް ފަހުންނެވެ. އޭރު އޭނާ އޮތީ ގުޑާލަންވެސް ނުވަތަ ވާހަކަދައްކަންވެސް ނޭނގޭ ޙާލުގައި އައި.ސީ.ޔޫގައެވެ
ދެދުވަސް ފަހުން، މަލަކުލް މައުތު ވަޑައިގެން މާރިޔާގެ ފުރާނަ ހިއްޕެވިއެވެ. އެ ވަގުތު އޭނާ ޝަހާދަތް ކިޔުމަށާއި، ތައުބާވުމަށާއި، އަދި ﷲ ގެ ޙަޟްރަތަށް އެނބުރި ދިއުމަށް އެދޭނެކަން ކަށަވަރެވެ. ނަމަވެސް، ހިތާމައަކީ ވަގުތު ފާއިތުވެއްޖެއެވެ. އޭނާގެ ފުރާނަ ހިއްޕެވިއްޖެއެވެ
މަރުވާ އަންހެނުން ހިނަވާ އަންހެން މީހާ ފަހުން މި ވާހަކަ ޝައިޚަށް ކިޔައިދިނެވެ. އޭނާ ބުންޏެވެ: މާރިއާގެ ހަށިގަނޑު ހިނަވަން ފެށިތަނާހެން، އޭނާގެ މޫނުގެ ކުލަ ބަދަލުވާން ފެށިކަން ފާހަގަވިއެވެ. މާރިޔާގެ މޫނުގެ ކުލަ އަނދިރިވާން ފަށައި، އެއަށްވުރެ ބޮޑަށް ކަޅުވެ، ބަލަންވެސް ނުކެރޭވަރަށް މުޅިން ކަޅުވެގެންދިޔައެވެ
އެއަށްވުރެ ބިރުވެރި ކަމަކީ، މާރިއާގެ އަނގައިން ނުބައިވަސްދުވާ ލޮންޖާއި ހަޑިމުޑުދާރު ދިޔާ އެއްޗެހިތަކެއް ހުއްޓުމެއްނެތި ބޭރުވަމުންދިޔުމެވެ. އެ ތަކެތި އެ އަންނަނީ ކޮންތާކުންކަމެއް ނުވަތަ އޭގެ އަޞްލަކީ ކޮބައިކަމެއް ހިނަވާ މީހާއަކަށް ނޭނގުނެވެ. މޫނާއި އަނގަ ސާފުކުރުމަށް ފެންއަޅާ ކޮންމެ ފަހަރަކު، އިތުރު ހަޑި އެއްޗެހި އަނގައިން ނިކުމެއެވެ. އެންމެ ފަހުން، އެކަން ހުއްޓުވަން ނުކުޅެދިގެން ހިނަވާ މީހާ އުންމީދު ކަނޑާލިއެވެ. އެންމެ ފަހުން، އޭނާގެ އަނގައިން އެ ހަޑިއެއްޗެހި ނިކުންނަނިކޮށް، އެގޮތުގައި ހުއްޓާ އޭނާ ކަފުންކޮށް، ކަށުނަމާދުކޮށް، ސަހަރާއަށް ގެންގޮސް ވަޅުލިއެވެ
ކީރިތި ރަސޫލާ ﷺ ޙަދީޘްކުރައްވާފައިވަނީ، މީހަކު މަރުވި ގޮތެއްގެ މަތިން އެމީހަކު ޤިޔާމަތްދުވަހުން އަލުން ދިރުއްވޭނެ ކަމަށެވެ. އޭނާ މަރުވީ ދެބައޮޑުވުމާއި ފިތުނަ އުފެއްދުން އަދި އާއިލާ ރޫޅާލުމުގެ ނުބައި ޢަމަލުގެ މަތީގައެވެ. އޭނާ ވަޅުލުމުގެ ތައްޔާރީތަކުގައިވެސް އެ ބިރުވެރި ޙާލަތާ ކުރިމަތިލާންޖެހުނެވެ. އަދި ﷲ ގެ ޙަޟްރަތުގައްޔާއި އެންމެހާ ޚަލްޤުތަކުންގެ ކުރިމަތީގައި އޭނާ މަޙްޝަރުކުރެވޭނީވެސް ހަމަ އެ ޙާލަތުގައެވެ
އަހަރެމެންގެ އަޚުންނާއި އުޚުތުންނޭވެ! އަހަރެމެން މިކަމުން ޢިބުރަތް ޙާޞިލުކުރަންޖެހެއެވެ. ބައެއް މީހުން މީސްމީހުންގެ މެދުގައި ނުތަނަވަސްކަން އުފެއްދުމަށްޓަކައި، އެކަކު ދެއްކި ވާހަކަ އަނެކަކަށް ކިޔައިދީ، ދެބައޮޑުވުން އާދައަކަށް ހަދާ ނުވަތަ އެކަމުން އުފާލިބިގަނެއެވެ. އަހަރެމެން މި ދުނިޔެއަކީ މިފަދަ ހަޑިމުޑުދާރު ކަންކަން ކުރާ ތަނަކަށް ހަދައިގެން ނުވާނެއެވެ
އަހަރެމެން ދެބައޮޑުވުމާ ދުރުކޮށްދެއްވުމަށާއި، މިފަދަ ކަންކަމުގައި ބައިވެރިވުމުން ރައްކާތެރިކޮށްދެއްވުމަށާއި، އަދި އަބަދުވެސް ސީދާވެގެންވާ ތެދުމަގުގައި ލެހެއްޓެވުމަށް ﷲ ގެ ޙަޟްރަތުން އެދި ދަންނަވަމުއެވެ. އަދި މިފަދަ ވާހަކަތަކުން ޢިބުރަތް ލިބިގަނެ، އެކަލާނގެއާ ކުއްތަންވުމުގެ ތައުފީޤު ﷲ އަހަރެމެންނަށް ދެއްވާށިއެވެ
Varah reethi vahaka eh
ވެރީ ނައިސް ސްޓޯރީ އެންޑް އިންސްޕަޔަރޑް
ޔާﷲ މިފަދަ ކަންކަމުން މިއަޅާ ސަލާމަތް ކުރައްވާންދޭވެ! ދުޢާ އެމްވީ ހިންގާ ފަރާތަށް ހެޔޮ ރަޙްމަތް ލައްވާށިއެވެ
މިފަދަ ކަންކަމަކީ މިއަދު ވަރަށް ގިނަ އަންހެން ބޭފުޅުންނަށް ނޯމަލް ކަންކަން. ހުރި ހިތާމައެއްގެ ބޮޑުކަމާއެވެ. ވަރިވެގެން އުޅޭ ވަރަށް ގިނަ އަންހެނުން އެހެން މީހުންގެ ދިރިއުޅުން ހަލާކުރުމަށް ފިރިހެނުން ހެއްލުން ނުވަތަ އަނބިމީހާއާމެދު ޝައްކު އުފައްދައިގެން ދިރިއުޅުން ހަލާކުކުރުން އާންމު ކަމަކަށްވެއްޖެ