އަހަރެންގެ މަންމައަށް ސްޓޭޖް 4 ގެ ކެންސަރު ޖެހިފައި ހުރިކަން އެނގުނީ ކުއްލިއަކަށެވެ. މަންމަ ދުނިޔޭގައި ހުންނާނެކަމަށް ޑޮކްޓަރ ލަފާކުރީ ގިނަވެގެން 3 ހަފުތާއެވެ. ކެންސަރު ބަލީގައި ތަންމަތީގައި އޮންނަން ޖެހުމުން ފުރަތަމަ ފަހަރަށް މަންމަގެ ހިތް އިސްލާމް ދީނަށް “މަޑުމޮޅި” ވާންފެށިއެވެ. އޭގެ ކުރިން މުޅި އުމުރުގައިވެސް މަންމަ އަކީ އެއްވެސް ދީނެއް ޤަބޫލުނުކުރާ އަދި ދީނަކަށް އުޅުމަށް ދަރިންނަށްވެސް ބާރުނާޅާ މަންމައެކެވެ. މިހެންކަމުން އިސްލާމްދީނާ ވީކޮޅަށް މަންމަގެ ހިތް މަޑުމޮޅިވުމަކީ މުޢުޖިޒާތެއްފަދަ ކަމެކެވެ
މަންމަ (އެ ބަލި ހާލަތުގައި) އިސްލާމް ދީނަށް މަޑުމަޑުން އެނބުރެން ފެށި މައިގަނޑު ސަބަބަކީ މިއެވެ. އެއް ދުވަހަކު، ކައިރިއަށް އައުމަށް މަންމަ އަހަރެންނަށް ގޮވިއެވެ. އޭރު މަންމަ ވަނީ މަރުގެ ތުންފަންމަތީގައި ކަހަލަ ގޮތަކަށް ހާލު ގޯސްވެފައެވެ. މަންމަ ބުނީ މަރުވުމުން ވަޅުނުލައި އަންދާލުމަށެވެ. އަހަރެން ބުނީމެވެ. މަންމާއެވެ. މައްސަލައެއްނެތެވެ. އެކަމަކު މަންމަގެ ހަށިގަނޑު އަންދާނީ ފައިސާ ދީފައި އެކަން ކުރަން ތިބޭ ބައެއް ނޫންހެއްޔެވެ؟
މަންމަގެ ހަށިގަނޑަށް އެކި ޒާތުގެ ކެމިކަލް އަޅައި ހަށިގަނޑަށް ނުހަނު އިހާނެތިކަންވެސް ލިބޭނެ ނޫންހެއްޔެވެ؟ އެވަގުތު މަންމަ ބުންޏެވެ. އެހެން ވިއްޔާ ދަރިފުޅު ބުނެބަލާށެވެ. ދެން އޮތީ ކޮން ގޮތެއްހެއްޔެވެ؟ އަހަރެން ބުނީމެވެ. ދެން އޮތްގޮތަކީ، މަންމަ މަރުވުމުން އަހަރެންނާއި މަންމަގެ ފިރިހެން ދަރިން މަންމަ އުފުލާނީއެވެ. އަދި މަންމަގެ އަންހެން ދަރިންނާއި މަންމަގެ ފިރިހެން ކުދިންގެ އަނބިން މަންމަ ފެންވަރުވާނެއެވެ. ހަށިގަނޑުގައި ހުވަނދުލާނެއެވެ. އެންމެ އާދައިގެ ހުދު ފޮތިން ހަށިގަނޑު ނިވާކުރާނެއެވެ. އެހެން އެއްވެސް މީހަކަށް މަންމަގެ ހަށިގަނޑު ނުފެންނާނެއެވެ. ނުވެސް ބީހޭނެއެވެ. އަދި ވަރަށް އާދައިގެ ގޮތަކަށް ބިމުގެ އަޑީގައި ވަޅުލާނެއެވެ. އަހަރެން މިހިސާބަށް ބުނާއިރަށް މަންމަ ބުންޏެވެ. “އަހަރެން ބޭނުމީ ތިގޮތެވެ.”
އެކަމަކު މަންމަ އެގޮތަށް ބޭނުންވިޔަސް އަހަރެންނަށް މައްސަލައެއް ދިމާވިއެވެ. އެއީ މަންމަ އަކީ މުސްލިމަކަށް ނުވާތީ މުސްލިމް ޖަނާޒާއެއް މަންމައަށް ނުބޭއްވޭނެއެވެ. އަހަރެންގެ ކޮއްކޮ އާއި ދައްތަ ވަކިން ގެންގޮސްވެސް މަންމަ ބުނީ ތިމަންނަ ބޭނުމީ މުސްލިމް ޖަނާޒާއެއްކަމަށެވެ. އަހަރެން މަސައްކަތް ކުރަމުންދިޔައީ މިފަދަ ގޮތަކަށް މަޑުމަޑުން މަންމަގެ ހިތް އިސްލާމްދީނާ ގާތް ކުރެވޭތޯއެވެ. އަނެއް ދުވަހު އަހަރެން މަންމަ ކައިރީގައި ވަރަށް ގިނަ ވަގުތު ހޭދަކުރިއިރު ބުނީމެވެ. މަންމާއެވެ.
ކަލަކު ވޮޑިގެން ނުވާނަމަ، ރަސޫލުންނާއި ހެޔޮ ކަންކަމަށް އަމުރުކުރާނެ މީހުން ދުނިޔެއަށް އަންނަނީ ކިހިނެއް ހެއްޔެވެ؟ މިއޮއްބޮޑު ކާއިނާތު އެއްވެސް މީހަކާނުލައި އުފެދޭނެހެއްޔެވެ؟ މިފަދަ ވާހަކަތަކެއް އަހަރެން ދެއްކުމުން މަންމަ ބުންޏެވެ. ދަރިފުޅާއެވެ. އާނއެކެވެ. ކަލަކުވޮޑިގެން ވާކަމަށް މަންމަ ޤަބޫލުކުރަމެވެ. ރަސޫލުންވެސް އެކި ޤައުމުތަކަށް ވަޑައިގެންނެވިކަމަށް އަހަރެން ޤަބޫލުކުރަމެވެ.
އެހިސާބުން އަހަރެން ވަރަށް އުފާވިއެވެ. އެހެނީ ކަލަކު ވޮޑިގެންވާކަމާއި ރަސޫލުން ވަޑައިގެންނެވިކަމަށް މަންމަ ހިތުގެ އަޑިން ޤަބޫލުކުރާތީ، އިމާމް ކައިރީގައި އާދޭސްކޮށްގެންނަމަވެސް މަންމައަށް މުސްލިމް ޖަނާޒާއެއް ދެވިދާނެތީއެވެ. އަދި އެކަންކަން މަންމަ މިހާރު ޤަބޫލުކުރާތީ މަންމަ ނިޔާވިޔަސް ހެޔޮ ދުޢާކުރުމުން މަންމަގެ ފާފަފުއްސަވާފާނެކަމަށް އަހަރެން ހީކުރީމެވެ. މިވާހަކަ އަހަރެންގެ އެންމެ 14 އަހަރުގެ ދަރިފުޅު ހުރިތަނުގައި ދެއްކުމުން އޭނާ ޤަބޫލުނުކުރިއެވެ. އޭނާ ބުނީ މަންމަ ދުލުން ޝަހާދަތް ކިޔަންޖެހޭނެކަމަށެވެ. ނަމަވެސް އަހަރެން ކުރާނީ ކީއްހެއްޔެވެ؟ އެ ބޮޑު ބަލީގައި އެ ވޭނުގައި މަންމަ އޮއްވާ މަންމަ ކައިރީގައި ޝަހާދަތް ކިޔާށޭ ބުނުމުން ނުކިޔައިފިނަމަ އަދި އެކަމާ ހިތްހަމަނުޖެހިއްޖެނަމަ މަންމަގެ ބަލިބޮޑުވެސް ވެދާނެއެވެ.
މި ފިކުރުގައި ހުއްޓާ އަހަރެންގެ 14 އަހަރުގެ ދަރިފުޅު އައިސް ބުންޏެވެ. ބައްޕާއެވެ. އަހަރެން މާމައާ ވާހަކަ ދައްކާނަމެވެ. އެހެންބުނެ އޭނާ މަތީ ފަންގިފިލާގައި މަންމަ އޮންނަ ކޮޓަރިއަށް ދިޔައެވެ.
ކަންތައް ވާނެ ގޮތަކާމެދު ހާސްވެ އަހަރެން ގޭގެ ތިރީގައި ދެކޮޅަށް ހިނގާލަހިނގާލާ ގަޑިއެއްހާއިރު ހުރީމެވެ. އޭގެ ފަހުން ދަރިފުޅު އައިސް ބުންޏެވެ. ބައްޕާއެވެ. ވަރަށް ފަސޭހައެވެ. އެކަން ނިމިއްޖެއެވެ. މާމަ ޝަހާދަތް ކިޔައިފިއެވެ. އަހަރެން ބުނީމެވެ. ހަމަ ޢަރަބި ބަހުން ހެއްޔެވެ؟ ދަރިފުޅު ބުންޏެވެ. އާނއެކެވެ. އެއްކޮށް “ފުލްކޮށް” މާނައާއެކު ކިޔައިފިއެވެ. އަލްޙަމްދުލިއްލާހިއެވެ. އޭގެ ދެތިން ދުވަސްފަހުން މަންމަ ނިޔާވެއްޖެއެވެ.
އެ އަހަރުގެ ހައްޖަށް ދިޔުމަށް އަހަރެން އެއްވެސް ވަރަކަށް ނުވިސްނަމެވެ. އެއީ މަންމަ ނިޔާވިތާ މަސްދުވަސް ވީއިރުވެސް އެ ހިތްދަތިކަމުން އަހަރުމެންނަށް އަރައިނުގަނެވޭތީއެވެ. ނަމަވެސް އިސްލާމިކް ޗެނަލަކުން އަހަރެންނަށް ގުޅާފައިބުނީ އެއަހަރުގެ ޙައްޖުގެ ކަވަރޭޖް ގެނެސްދިނުމަށް ޙައްޖަށް ދިޔުމަށް ދައުވަތު ދޭކަމަށެވެ. ނަމަވެސް މަންމަގެ ކުއްލި މަރުގެ ހިއްދަތިކަމުގައި އުޅޭތީ އެކަމާ އެއްބަސްނުވީމެވެ. ނަމަވެސް ޙައްޖަށް މަދުދުވަސްކޮޅަކަށް ވުމުން އަނެއްކާވެސް ހަމަ އެޗެނަލުން ގުޅާފައިބުނީ ދާންއޮތް އެހެން މީހަކަށް ނުދެވޭތީ ކޮންމެހެންވެސް އަހަރެން ޙައްޖަށް މިފަހަރު (ލައިވް ކަވަރޭޖް ދިނުމަށް) ގޮސްދިނުމަށެވެ. އެންމެ ފަހުން އަހަރެން އެއްބަސްވީމެވެ. އެއީ އަހަރެންގެ މަންމަގެ މަތިން ޙައްޖުވުމަށެވެ. މަންމަ ނިޔާވިތާ 3 މަސްތެރޭ މަންމައަށް ޙައްޖެއްވުމަށް އަހަރެންނަށް ފުރުޞަތު ލިބުނީއެވެ.
މަންމަ ނިޔާވީ ރަމަޟާންމަހުގައި ކަމުންނާއި ޙައްޖު ކަވަރޭޖާއި އަހަރެންގެ ޓީވީ ޝޯތަކުގައި މަންމަގެ ވާހަކަ އަހަރެން އިސްލާމިކް އެ ޗެނަލް މެދުވެރިކޮށް ގެނެސްދިނުމަށް އެތައް މިލިޔަން ބަޔަކަށް އެ މެސެޖް ލިބުނެވެ. އަދި މަންމަގެ ނަމުގައި ދުނިޔޭގެ އެތައް މިލިޔަން ބަޔަކު ޞަދަޤާތް ކުރިއެވެ. އެކަކު މަންމަގެ ނަމުގައި މިސްކިތެއްވެސް އެޅިއެވެ. މަންމައަށް ދަރުމަ އެދިގެން، މަންމަގެ ނަމުގައި އެތަކެއް ޔަތީމް ކުދިންނަކަށް މީހުން ޚަރަދުކުރިއެވެ.
ސުބްޙާނަﷲ! ދީނެއް ޤަބޫލުނުކޮށް އުމުރުދުވަހު އުޅުނު މަންމަ ނިޔާވުމުގެ ބަރާބަރު 3 ދުވަސްކުރިން އިސްލާމްވެ މުސްލިމެއްގެ ޝަރަފުގައި ނިޔާވީއެވެ. މަންމަގެ ނަމުގައި ޙައްޖުވެ އެތަކެއް ޞަދަޤާތެއްކޮށް (މަންމަ އޭގެ ކުރިން ނުވެސް ދަންނަ) އެތައް ބަޔަކު މަންމައަށް ހެޔޮދުޢާކުރިއެވެ. މަންމަގެ ނަމުގައި މިސްކިތެއްވެސް ބިނާކުރީއެވެ. ސުބްޙާނަﷲ! ﷲ އަކީ ރަޙްމާންވަންތަ އަދި ރަޙީމްވަންތަ ރަސްކަލާނގެއެވެ. އެންމެ އޯގާވެރި ފަރާތެވެ.
*މިއީ އަލްއަޚް ރަޙީމް ޖަންގް ދީފައިވާ ބަސްދީގަތުމަކުން ކޮށްފައިވާ ތަރުޖަމާއެކެވެ.