ލޮބުވެތި އަޚުންނާއި އުޚުތުންނޭވެ. މިއަދުގެ މި ވާހަކައިން އަޅުގަނޑުމެން އުނގެނެންވީ ހަމައެކަނި އެއް ކަމެކެވެ. އެއީ ނަބިއްޔާ ﷺ ގެ ޙަދީޘްފުޅެވެ. އެކަލޭގެފާނު ޙަދީޘް ކުރެއްވިއެވެ. އެސްފީނާއަކީ (ނުވަތަ އެސްފީނާގެ އަސަރަކީ) ޙައްޤު ތެދެކެވެ. އެއީ ޙަޤީޤަތެކެވެ. އަދި ކޮންމެ މީހަކަށްވެސް އެއިގެ އަސަރު ފޯރާފާނެއެވެ
ސައުދީ އަރަބިއްޔާގައި ދިރިއުޅެމުން، ޖަމާޢަތްތެރި އުޚުތަކު ކިޔައިދީފައިވާ މި ވާހަކައަށް އަޑުއަހާށެވެ. އޭނާ ބުންޏެވެ. “އެއްދުވަހަކު އަހަންނަށް ފޯނުކޯލެއް އައެވެ. އެއީ މައްޔިތަކު ހިނަވައިދިނުމަށް ހިނަވާގެއަށް އައިސްދިނުމަށް އެދިއެވެ. އަހަރެން އާދައިގެ މަތިން އޯކޭއޭ ބުނެ އެތަނަށް ދިޔައީމެވެ. އަހަންނަށް އެތަނަށް ވަދެވުނު ވަގުތު، އަދި ވަނުމުގެ ކުރިންވެސް، ވަރަށް ބާރަށް ރޮއި ހޭޅޭ އަޑު އިވުނެވެ. އެހެން އަންހެނުންތައް ދިޔައީ ހަޅޭއްލަވައި ރޮމުންނެވެ. އެއީ ވަރަށް ދެރަވެފައިވާ ޙާލަތެކެވެ. އަހަރެން އެތަނަށް ވަނީމެވެ. އަހަރެން ވަތްއިރު އެތާ ތިބި އަންހެން ގާތްތިމާގެ މީހުން ރޮމުންދިޔަ އަޑު އިވެއެވެ. ނަމަވެސް ހިނަވާ އެނދުމަތީގައި، އަހަރެން ހިނަވައިދޭން އޮތް މައްޔިތާ ފެނިފައި އަހަންނަށް ބޮޑު ސިހުމެއް ލިބުނެވެ. ސުބުޙާނަﷲ! އެއީ އެންމެ ދެ އަހަރުގެ ކުޑަކުޑަ އަންހެން ކުއްޖެކެވެ
އެ އުޚުތު ބުންޏެވެ. “އަހަރެންގެ ކުރިމަތީގައި އެއޮތް ދެ އަހަރުގެ ކުޑަ އަންހެން ކުއްޖާ ފެނިފައި އަހަންނަށް ގަބޫލެއްވެސް ނުކުރެވުނެވެ. އަހަންނަށް ބޮޑު ސިހުމެއް ލިބި، އަޖާއިބުވިއެވެ.” އެ އުޚުތު ބުނަމުންދިޔައެވެ. ސުބުޙާނަﷲ! އޭނާ ބުންޏެވެ. އެ ކުއްޖާގެ ހަންގަނޑު ހުދެވެ. ތުންފަތާއި ކޮލުގެ ކުލައަކީ ފިޔާތޮށި ކުލައެވެ. އިސްތަށިގަނޑަކީ ގަދަ މުށިކުލައާއި މަޑު މުށިކުލައިގެ މަސްހުރި ކުލައެކެވެ. އަހަރެން ހީކުރީ އެއީ ބޭރު ގައުމެއްގެ ކުއްޖެއް ކަމަށެވެ. ސައުދީ އަރަބިއްޔާގެ ކުއްޖެއް ނޫން ކަމަށެވެ. މިހާ ރީތި ކުއްޖަކު މަރުވީ ކިހިނެއް ހެއްޔެވެ؟ އޭނާގެ މޫނުމަތީގައެއް، ހަށިގަނޑުގައެއް އެއްވެސް ނިޝާނެއް ނެތެވެ. ވެއްޓިގެން ނުވަތަ އެކްސިޑެންޓެއް ވެގެން ލިބިފައިވާ ފަދަ އެއްވެސް ޒަޚަމެއް ނެތެވެ. އޭނާ އެ ޢާއިލާއަށް ބަލާލިއެވެ. އަދި އެ ޢާއިލާއިން އޭނާއަށާއި މަރުވެފައިވާ ކުއްޖާއަށް ބަލާފައި މާ ބޮޑަށް ރޮއެގަތެވެ. އޭނާ އެތާ އިން ދުވަސްވީ އަންހެނަކަށް ބަލާލިއެވެ. އޭނާ ދިޔައީ ރޮމުންނެވެ
އެހެންކަމުން އެއީ އެކުއްޖާގެ މަންމަ ކަމަށް ހީކޮށް، އޭނާ ކައިރިއަށް ގޮސް ބުންޏެވެ. “މާތް الله ތިޔަ ޢާއިލާއަށް ކެތްތެރިކަން ދެއްވާށި. ކިހިނެއްވީ ހެއްޔެވެ؟ އެކުއްޖާ މަރުވީ ކިހިނެއް ހެއްޔެވެ؟” އޭނާ ބޭނުންވީ ވާހަކަ ދައްކާލައިގެން އެމީހާ ހަމައަކަށް އަޅުވާށެވެ. އެމީހާ ރޮމުން ބުންޏެވެ. “ތިއީ އަހަރެންގެ ދަރިއެއް ނޫނެވެ. އެއީ އަހަރެންގެ މާމަ ދަރިއެކެވެ.” މާމަ ދަރިއެއް ހެއްޔެވެ؟ މާމަ މިހާވަރަށް ރޮއެ ހަދާއިރު މަންމަ ކޮބައި ހެއްޔެވެ؟ އަހަރެން ގޮސް މަންމައަށް ހިތްވަރުދީ މަސަލަސްކުރަން ވެއްޖެއެވެ. އެމާމަ، އެކުއްޖާގެ މަންމައާ ދިމާއަށް އިނގިލި ދިއްކޮށްލިއެވެ
އެ މަންމަ އިނީ ހިމޭންވެފައެވެ. އޭނާގެ ލޯ ހުރީ ބޮޑަށް ހުޅުވިފައެވެ. އަދި އަނގަ ހުރީ ހުޅުވިފައެވެ. އެބަހީ އޭނާ ހުރީ ބޮޑު ސިހުމެއްގައެވެ. އޭނާ ރޮނީކީ ނޫނެވެ، ވާހަކަ ދައްކަނީކީ ނޫނެވެ، އޭނާ ހަމައެކަނި ބަލަހައްޓައިގެން އިނީ އޭނާގެ ދަރިފުޅަށެވެ. އަހަރެން އޭނާގެ ކައިރިއަށް ގޮސް ބުނީމެވެ. “މާތް الله ކެތްތެރިކަން ދެއްވާށި.” އަހަރެން އޭނާއާ ވާހަކަދެއްކިއިރުވެސް އޭނާ އިނީ ހަމަ އެ ގަނޑުވެފައިވާ ޙާލަތުގައެވެ. ދަރިފުޅާ ދިމާއަށް ލޯ ބޮޑުކޮށްގެން، އަނގަ ހުޅުވައިގެން ބަލަހައްޓައިގެންނެވެ. މިނެޓެއް ނުވަތަ ދެ މިނެޓެއްވަންދެން ވާހަކަދެއްކުމުންވެސް އޭނާ އެއްވެސް ޖަވާބެއް ނުދެއެވެ
ދެން އަހަރެން އެނބުރި އައީ ހިނަވައިދިނުމަށެވެ. އެއީ ހާދަ ރީތި ކުޑަ އަންހެން ކުއްޖެކެވެ. އަހަރެން ހީކުރީ އެއީ މި ގައުމުގެ ކުއްޖެއް ނޫން ކަމަށާއި، ޔޫރަޕްގެ ގައުމެއްގެ ކުއްޖެއް ކަމަށެވެ. ނަމަވެސް މުޅި ޢާއިލާއަކީ އަރަބިންނެވެ. އެހެންކަމުން އެތާ ތިބި މަސައްކަތްތެރިން ކައިރީގައި އެއީ ކޮން ކުއްޖެއްތޯ އެހުމުން ބުންޏެވެ. އެއީ ޔަމަނުގެ ކުއްޖެކެވެ. ޙަޤީޤަތުގައި އެހާ ރީތި މޫނަކާއި، ރީތި ހަށިގަނޑަކާއި، ރީތި އިސްތަށިގަނޑެއް ހުރި ކުއްޖަކީ ޔަމަނު ކުއްޖެއްކަން އެނގުމުން އޭނާއަށް މާ ބޮޑު ސިހުމެއް ލިބުނެވެ. އެވަރުން ނިމުނީއެއް ނޫނެވެ. އޭނާ ބުންޏެވެ. “އަހަރެން އެކުއްޖާގެ އަތުގެ އިނގިލިތަކުން ފެށިގެން ކަނދުރާއާ ހަމައަށް ބެލީމެވެ. މުޅި ދެއަތް ހުރީ ހީނާފަތުން ނަލަހައްދާފައެވެ
އެ ކުއްޖާ ބާއްވާފައި އޮތްއިރު ހީވަނީ ހަމަ ރީތި ޑޯލްއެއް ހެންނެވެ. އެ އުޚުތު ރޯން ފެށިއެވެ. އެންމެން ރޮމުންދާތީ އޭނާއަށްވެސް ރޮވުނީއެވެ. އަދި މި ކުޑަކުއްޖާގެ އުމުރާއި، އޭނާގެ ޙާލަތާއި، ރީތިކަން ފެނިފައި އޭނާ މާ ބޮޑަށް ރޮއެ ހެދިއެވެ. އެއަށްފަހު އޭނާ ހިނަވައިދޭން ފެށިއެވެ. ހުރިހާ ކަމެއް ވަރަށް އޮމާންކޮށް ނިމި، ކަފުން ކުރިއެވެ. ދެން އޭނާ ކިހިނެއްވީތޯ އެހުމުން ޢާއިލާގެ ބައެއް މީހުން ބުންޏެވެ. “އަހަރެމެން ފަހުން ކިޔައިދޭނަމެވެ.” އެމީހުން އެ ކުޑަ ކުއްޖާ މިސްކިތަށް ގެންގޮސް، ކަށުނަމާދުކޮށް، ވަޅުލިއެވެ
ދެން ލިބުނު އަނެއް ސިހުންވެސް ބޮޑެވެ. އެ އުޚުތު ހުރީ މުޅިން ހިތްހަލާކުވެފައެވެ. އޭނާ ގެއަށް ގޮސް އޭނާގެ އަމިއްލަ ޢާއިލާއަށް ކިޔައިދިނެވެ. މިހާ ރީތި، ހުރިހާ ކަމެއް ފުރިހަމަ ދެ އަހަރުގެ ކުއްޖަކު މަރުވި ވާހަކައެވެ. އަދި ހަމަ އެދުވަހުގެ ފަހުގެ ވަގުތެއްގައި ކިހިނެއްވީތޯ އެހުމުން އެމީހުން ކިޔައިދިނެވެ. “މި ދެ އަހަރުގެ ކުއްޖާއާއި އޭނާގެ ހަތަރު އަހަރުގެ ދައްތައަށް އާ ހެދުންތަކެއް ލެއްވިއެވެ. އެކުދިން ހެދުން ލައިގެން، ހީނާފަތް އަޅަން އެހެން އަންހެނެއްގެ ކައިރިއަށް ދިޔައެވެ. އެ ކުޑަކުޑަ ހުދު ދެއަތުގައި ގަދަ ކުލައިގެ ހީނާފަތް އެޅުމުން ހާދަ ރީއްޗެވެ. އެކުދިންގެ އިސްތަށިގަނޑުވެސް ހާދަ ރީއްޗެވެ. ދެން އެކުދިން ދިޔައީ އަންހެނުންގެ ޖަލްސާއަކަށެވެ (ޕާޓީއަކަށެވެ)
އެތަނުގައި މިއުޒިކް ކުޅެމުންދާތީ އެކުދިން އުފަލުން ދިޔައީ ފުންމާ ކުޅެމުންނެވެ. އެވަގުތު ބައެއް އެހެން އަންހެނުން އެ ކުދިންގެ ޓިކްޓޮކް ނުވަތަ ސޯޝަލް މީޑިއާގައި ލައިވް ވީޑިއޯ ހަދަން ފެށިއެވެ. ލައިވް ވީޑިއޯ ހެދުމުގެ ސަބަބުން ގިނަ އަދަދެއްގެ ބަޔަކު އެ ލައިވް ބަލަމުންދިޔައެވެ. މުޅި ލައިވްގެ ސަމާލުކަން ހުރީ މި ދެ ކުދިންނަށެވެ. މިކަން މިހެން ހިނގަމުންދަނިކޮށް، އެކުދިން އެއްޗެއް ކެއެވެ. ކުޅެމުން ގޮސް އެއްޗެއް ކެއުމަށްފަހު، ކުއްލިއަކަށް މި ދެ ކުދިންވެސް ބޮޑަށް ހޮޑުލާން ފެށިއެވެ. ކުއްލިއަކަށް ދެކުދިން އެކުގައި ހޮޑުލީއެވެ. އެ ކުޑަ ކުއްޖާ ހުއްޓާނުލާ ހޮޑުލަމުން ގޮސް، ހޮޑުގެ ސަބަބުން ނޭވާ ނުލެވިގެން ހަންގަނޑުގެ ކުލަ ބަދަލުވިއެވެ. އަދި އޭނާ ވެއްޓުނެވެ. އެމީހުން އޭނާ ހޭއަރުވަން އުޅުމުން އެނގުނީ އޭނާ އެތަނަށް ވަގުތުން މަރުވެފައިވާ ކަމެވެ
ދެން ހަތަރު އަހަރުގެ (ނިޔާވި ކުއްޖާގެ) ދައްތައަށް ވީ ކިހިނެއް ހެއްޔެވެ؟ އޭނާވެސް ދިޔައީ ހޮޑުލަމުންނެވެ. އޭނާގެ ޙާލަތުވެސް ވަރަށް ގޯހެވެ. އެމީހުން ވަގުތުން އޭނާ ހޮސްޕިޓަލަށް ގެންގޮސް އައި.ސީ.ޔޫ ގައި ބޭއްވިއެވެ. މިއީ އެ އުޚުތަށް ފުރަތަމަ ދުވަހު ހިނަވައިދިން އިރު އެނގުނު ވާހަކައެވެ. އޭނާ ގެއަށް ގޮސް އޭނާގެ ޢާއިލާއަށް މި ވާހަކަ ކިޔައިދިނެވެ. ޖެހިގެން އައި ދެވަނަ ދުވަހު، އަނެއްކާވެސް މަރުވާ މީހުން ހިނަވާގެއަށް އައިސްދިނުމަށް އެދި އޭނާއަށް ފޯނުކޯލެއް އައެވެ. އޭނާ އެތަނަށް ދިޔައިރު، ހިނަވާ އެނދުމަތީގައި އޮތީ ހަމަ އިއްޔެ ފެނުނު ކުއްޖާ ކަހަލަ، އެކަމަކު އޭގެއަށްވުރެ ކުޑަކޮށް ބޮޑު ކުއްޖެކެވެ. އޭނާއަށް އެނގުނު ގޮތުގައި އެއީ އިއްޔެ އޭނާ ހިނަވައިދިން ކުއްޖާގެ ބޮޑު ދައްތައެވެ. ދެކުދިންގެ މޫނާއި، އިސްތަށިގަނޑާއި، ލޯ ހަމަ އެއްގޮތަށް ރީއްޗެވެ. އަދި އިނގިލިތަކުން ފެށިގެން ކަނދުރާއާ ހަމައަށް ހީނާފަތް އަޅާފައި ހުއްޓެވެ. ސުބުޙާނަﷲ، ދެއަތްވެސް އަޖާއިބެއް ފަދަ ރީއްޗެވެ. ނަމަވެސް ޖެހިގެން އައި ދުވަހު އޭނާވެސް މަރުވީއެވެ. އެމީހުން އޭނާ ގެނައީ ހިނަވާގެއަށެވެ
އެވަގުތު ޢާއިލާގެ މީހުން ތިބީ މުޅިން ހިތްހަލާކުވެފައެވެ. އަދި ފުރަތަމަ ފަހަރަށް އެ މަންމަ ބާރަށް ރޮނިކޮށް އޭނާއަށް ފެނުނެވެ. ފުރަތަމަ ދުވަހު މަންމަ ހުރީ ސިހުމެއްގެ ތެރޭގައެވެ. ވާހަކަވެސް ނުދެއްކި، ހަމައެކަނި ހަގު ދަރިފުޅަށް ބަލަހައްޓައިގެންނެވެ. ނަމަވެސް ދެވަނަ ދުވަހު މިކަން ދިމާވުމުން އޭނާ ރޮމުން ގޮވިއެވެ. “ބިންތީ، ބިންތީ (މަގޭ ދަރިފުޅާ، މަގޭ ދަރިފުޅާ)!” އަހަރެންވެސް މި ރީތި ކުޑަ އަންހެން ކުއްޖާ ހިނަވައިދެމުން ރޮމުންދިޔައީމެވެ. ހިނަވައި ކަފުންކޮށް ނިމުމުން އެމީހުން ބުންޏެވެ. “ބައްޕަ އެބަހުއްޓެވެ ބޭރުގައެވެ.” އެހެންވެ އެ އުޚުތު އެތެރެއަށް ވަނީއެވެ. އެވަގުތު ބައްޕައާއި އެހެން ފިރިހެނުން އެތަނަށް ވަނެވެ. އެ ބައްޕަ ހިތުގެ އަޑިން ބާރަށް ހަޅޭއްލަވައި ހަޅޭއްލަވައި ރޮއެގަތެވެ. އަދި “ބިންތީ ބިންތީ” އޭ ގޮވިއެވެ. އެ އުޚުތު ބުންޏެވެ. “الله ގަންދީ ބުނަމެވެ. އެ ބައްޕަ ހަޅޭއްލަވައި މަގޭ ދަރިފުޅާއޭ ކިޔައި ރޮއެގަތް ގޮތުން، ހިލައެއްވެސް ފަޅައިގެންދާނެއެވެ. އެއީ އޭނާގެ ހިތުގެ އެންމެ ފުނުން ނިކުތް އަޑެކެވެ.” ފަހުން އަހަންނަށް އެނގުނީ އެ ބައްޕައާއި މަންމައަށް ތިބީ އެންމެ ދެ ދަރިން ކަމެވެ. އެއީ މި ރީތި ދެ އަންހެން ކުދިންނެވެ. އަދި އެ ދެކުދިންވެސް މަރުވީއެވެ
ވަޅުލުމާއި ކަށުނަމާދުގެ ކަންކަން ނިމުމުން، އެ އުޚުތު ގޮސް އެކުދިންގެ މާމައާއި މަންމައާއި ޢާއިލާގެ މީހުންނާއެކު އިށީނދެ އެހިއެވެ. “ކިހިނެއް ހެއްޔެވެ ވީ؟” އެމީހުން ބުންޏެވެ. “އެކުދިން ކުޅެމުންދިޔައީއެވެ. ލައިވް ސްޓްރީމްކޮށް ޓިކްޓޮކް ވީޑިއޯ ނަގަމުންދިޔައީއެވެ. އަދި އެކުދިން މަރުވީއެވެ.” ދެން އެ އުޚުތު އެހިއެވެ. “ތިޔަބައިމީހުން الله ހަނދުމަކުރިން ހެއްޔެވެ؟ ހެނދުނާއި ހަވީރުގެ ޛިކުރުތައް އެދުވަހު ކިޔައި، ރައްކާތެރިކަން ހޯދިން ހެއްޔެވެ؟ ނަބިއްޔާ ﷺ އަޅުގަނޑުމެންނަށް ދަސްކޮށްދެއްވާފައިވާ ފަދައިން، ކުދިން ރައްކާތެރިކުރުމަށްޓަކައި މަދުވެގެން ތިން ފަހަރު ‘ނިޢުމަތްތަކުން ރައްކާތެރިކުރައްވާ’ ދުޢާތައް ކިޔައި، އަމިއްލަ ނަފްސާއި ކުދިން ރައްކާތެރިކުރިން ހެއްޔެވެ؟”
އެމީހުން ބުންޏެވެ. “ނޫނެކެވެ. އަހަރެމެން އެއިން ކަމެއް ނުކުރަމެވެ.” އެ އުޚުތު ވަގުތުން ބުންޏެވެ. “މިއީ އެސްފީނާއެވެ. ތިޔަބައިމީހުންގެ ކުދިންނަށް އެސްފީނާ ޖެހުނީއެވެ. މިއީ ޙަސަދަވެރިންގެ ޙަސަދައަކަށްވެސް ވެދާނެއެވެ. ތިޔަ ރީތި، ޚާއްޞަ ދެކުދިން އެ ޖަލްސާގެ ތެރޭގައި ކުޅެ ހަދަނިކޮށް، الله ހަނދުމަނުކުރާ ބަޔަކު އެކުދިންނަށް ބަލައި ފާރަލީއެވެ. ތިޔަބައިމީހުން އެކުދިން ކުޅެ ފުންމާ ހަދަނިކޮށް ލައިވް ވީޑިއޯތައް ޕޯސްޓްކުރީއެވެ. الله ހަނދުމަނުކުރާ، ބަރަކާތްލެއްވުމަށް ނޭދޭ މީހުން އެ ވީޑިއޯތައް ބަލާނެއެވެ. އެހެންކަމުން ޛިކުރުތަކުގެ އެހީގައި އަމިއްލަ ނަފްސާއި ޢާއިލާ ރައްކާތެރިކުރުމަކީ ތިޔަބައިމީހުންގެ ވާޖިބެކެވެ. މިއީ ނަބިއްޔާ ﷺ އެތައް ޙަދީޘްފުޅެއްގައި އަޅުގަނޑުމެންނަށް އަންގަވާފައިވާ ކަމެކެވެ. އަމިއްލަ ނަފްސަށާއި ޢާއިލާއަށް އަދި ކުޑަކުދިންނަށް ކިޔަވައި اللهގެ އިރާދަފުޅާއެކު ރައްކާތެރިކަން ހޯދާށެވެ
ލޮބުވެތި އަޚުންނާއި އުޚުތުންނޭވެ! ހިތާމައަކީ، އަޅުގަނޑުމެން މި އުޅެނީ ކޮންމެ ކަމެއް ސޯޝަލް މީޑިއާއަށް ލާ ޒަމާނެއްގައެވެ. ކާ އެއްޗެއް އަނގައަށްލުމުގެ ކުރިން، އެ އެއްޗެއް އޮންނަނީ ސްޓޯރީއަށާއި، ސްޓޭޓަސްއަށާއި، ފީޑަށް ލާފައެވެ. އާ ހެދުމެއް ލުމުގެ ކުރިން، އެ ހެދުން އޮންނަނީ ސޯޝަލް މީޑިއާއަށް އަރުވާފައެވެ. ހިތާމައަކީ، ތިޔަބައިމީހުން ތިޔަ ކާ އެއްޗެހި ނުކެވޭ އެތައް ބަޔަކު އުޅޭކަން ހަނދާން ނެތޭތީއެވެ. ތިޔަބައިމީހުން ތިޔަ ލާ ހެދުން ނުލެވޭ އެތައް ބަޔަކު އުޅެއެވެ. ތިޔަބައިމީހުން ތިޔަ ދާ ބާޒާރުތަކަށާއި ފިހާރަތަކަށް ގޮސް ފޮޓޯނަގައި ޕޯސްޓްކުރާއިރު، އެތަންތަނަށް ދާނެ ތަނަވަސްކަން ނެތް އެތައް ބަޔަކު އުޅެއެވެ. ތިޔަބައިމީހުން ކައިވެނިކޮށްގެން ފިރިމީހާ ނުވަތަ އަނބިމީހާގެ އަތުގައި ހިފައިގެން ފޮޓޯލާއިރު، ކައިވެނި ނުކުރެވިފައި އެތައް ބަޔަކު އުޅެއެވެ. އެހެންކަމުން ތިޔަބައިމީހުންގެ އުފާވެރިކަމާއި ނިޢުމަތްތައް އަމިއްލައަށް ސިއްރުކޮށްގެން ގެންގުޅޭށެވެ. މުޅި ދުނިޔެއަށް ދައްކާކަށް ނުޖެހެއެވެ. އެހެނީ ތިޔަބައިމީހުންނަށް ލިބިފައިވާ ނިޢުމަތްތައް ނުލިބޭ އެތައް ބަޔަކު އުޅެއެވެ. الله ތިޔަބައިމީހުންނަށް ބަރަކާތް ދެއްވާފައިވާނަމަ، އެ ނިޢުމަތްތައް އަމިއްލަ ނަފްސަށާއި ޢާއިލާއަށް ޚާއްޞަކުރާށެވެ. އަދި اللهއަށް ޙަމްދުކުރާށެވެ. އަދި ހެނދުނާއި ހަވީރުގެ ޛިކުރުތަކާއި، ނަމާދުތަކާއި، ނަމާދަށްފަހު ކިޔާ ޛިކުރުތަކުން اللهގެ ރައްކާތެރިކަން ހޯދާށެވެ
މާޝާﷲ ވަރަށް ރީތި. ކުރިއަށް ހުރި ވާހަކަތަކަށް އިންތިޒާރުކުރަން
މިފަހުން ކީ އެންމެ އަސަރުކުރުވަނިވި ވާހަކަ
މި ވެބްސައިޓް ހިންގާ ފަރާތަށް ހެޔޮ ރަޙްމަތް ލައްވާށި
މިއީ މިއަދު ރާއްޖޭގައި ވަރަށް އާންމު ކަމެއް
ވަރަށް އަސަރުކުރުވަނިވި ވާހަކައެއް
ތުއްތުބޭ އަބަދުވެސް ބުނާ ވާހަކައަކީ މިއީ. ކުރާކޮންމެ ކަމެއް ސޯޝަލްމީޑިއާއަށް ލާންޖެހޭހޭ
އަޅަމެންގެ ތުއްތުކުދިން ސަލާމަތްކުރައްވާށި
މި ޓިކްޓޮކް ރާއްޖެއަށް ބޭން ކުރަންވީ. އޭރުން މިކަން ހުއްޓޭނީ. ބަޔަކު މުޅިން އަަވަދިވަނީ މިކަމުގައި. އަބުރާ ބެހެނީ. ބަރަހަނާވަނީ
ދިވެހީންނަކީ ކޮންމެ ކަމެއްގައި ހައްދުފަހަނައަޅާ ބައެއް. ނުކުންނަ ކޮންމެ އާ ފޯނެއް ގަންނަންޖެހޭ. ވީޑިއޯ ކުރަންޖެހޭ